महाराष्ट्र खाकी ( विवेक जगताप / लातूर ) – लातूर आणि उदगीर शहरात गोविंदा-मुळे च्या मटक्याच्या व्यावसाय जोमात सुरु असून मटक्याच्या अधीन गेलेल्या तरुणांचे संसार कोमात गेल्याचे विदारक चित्र सध्या पाहावयास मिळत आहे. पोलिसांच्या छत्रछायेखाली मटका व्यावसायाने जोर धरला असून चौका-चौकात खुलेआम मटक्याचा बाजार सुरु आहे. पोलिसांबरोबर अवैध व्यावसायिकांचे जाळे किती घट्ट जुळलेले
आहे याचा प्रत्यय लातूर आणि उदगीर येथे गोविंदा-मुळेच्या मटक्यामुळे येत आहे आणि यामुळे पोलीस अधीक्षक अमोल तांबे यांच्या कार्यक्षमतेवर नागरिक, सामाजिक कार्यकर्ते प्रश्न उपस्थित करत आहेत. या व्यावसायातून दररोज लाखो रुपयांची उलाढाल होत असून पोलिसांकडून म्हणावी तशी कारवाई होत नसल्याने नागरिकांमधून संताप व्यक्त होत आहे. लातूर , उदगीर शहरात मजुरांची संख्या मोठ्याप्रमाणात आहे. त्यात तरुणांचीच संख्या जास्त आहे. मात्र बहुतेक तरुण झटपट पैसे
कमावण्याच्या नादात या खेळाच्या अधीन गेले असल्याने अनेकांचे संसार उद्ध्वस्त झाले आहेत. तर काहींचे संसार उद्ध्वस्त होण्याच्या मार्गावर आहे. अनेक तरुण हारजीतीच्या तणावाने इतरही व्यसनाच्या आहारी गेले आहेत. मटका चालवणाऱ्या गोविंदा- मुळेला पोलिसांच्या आशीर्वादाने व्यवसाय मिळाला असला तरी या व्यवसायाच्या नादी लागलेले इतर व्यावसायिक मात्र बरबाद झाल्याचे चित्र स्पष्ट दिसत आहे.
गोविंदा-मुळेच्या मटक्याच्या व्यसनाच्या अधीन गेलेल्या तरुणांच्या घरातील सदस्य मात्र चिंताग्रस्त आहेत. मटका या जुगाराचे अल्पवयीन मुलांना मोठ्याप्रमाणात व्यसन जडले आहे. ऐन शिकण्याच्या वयात ही मुले गोविंदा-मुळेच्या मटका जुगाराच्या नादी लागल्याने अनेकांचे भवितव्य अंधातरी गेल्याचे जाणवते. मटका जुगाराच्या हारजीतीमुळे अनेक तरुणांना दारुचे व्यसन जडले असल्याने घरातील दररोज होत असलेल्या
वादावादीमुळे संसार उद्ध्वस्त होताना दिसत आहे. लातूर शहर सध्या गोविंदा-मुळे च्या मटका व्यावसायासाठी प्रसिद्ध होत चालले आहे. त्यामुळे बाहेरगावचे मटका (जुगार) शौकिन लोकही कामधंदा न करता येथे येऊन दिवस दिवस बसत असतात. पोलिसांचा कायमच येथील गोविंदा-मुळे च्या मटक्याच्या व्यवसायाला वरदहस्त राहिल्याने अवैध व्यावसायिकांची मुजोरी सुरु आहे. अलिकडच्या काळात सोशल मिडीयाचा वापर मटका
जुगारासाठी केला जातो. मटका व्यवसायाला सोशल मिडीयामुळे चांगलेच बळ मिळाले असून पोलिसांपुढे हा व्यवसाय मोडीत काढण्याचे मोठे आव्हान उभे टाकले आहे. सोशल मीडियाच्या माध्यमातूनच मटका जुगाराचा खेळ खेळला जातो आणि त्या पेक्ष बऱ्याच ठिकाणी कार्बन लाऊन मटका घेतला जात आहे . तसेच अर्थिक व्यावहारही ऑनलाईनच होत असल्याने छुपे रुस्तुमांची संख्या वाढली आहे. यामुळे तरुणपिढी पूर्णपणे वाया जात असून खरंच पोलीस आपले मटका व्यावसायिकांशी
असलेले हितसंबध बाजूला ठेऊन ह्या गोविंदा-मुळे चा मटका व्यवसाय बंद होण्यासंबधी कारवाई करतील काय ? की पहिले पाढे पंचावन्न चालू ठेवत आपल्या अकार्यक्षमतेचे दर्शन घडवतील, असा प्रश्न लातूरचे सुज्ञ नागरिकांना पडला आहे.
