काँग्रेसचे सरचिटणीस (संघटन) आणि खासदार के.सी. वेणुगोपाल हेदेखील अगदी सुरुवातीपासूनच मुख्यमंत्रीपदाच्या शर्यतीत होते. मात्र, अंतिम टप्प्यात ते मागे पडले. वेणुगोपाल हे काँग्रेस नेते राहुल गांधी यांचे निकटचे विश्वासू मानले जातात. सुरुवातीला खासदार के. सी. वेणुगोपाल यांचे नाव चांगलेच चर्चेत होते. अनेक आमदारांनी त्यांना पाठिंबा दर्शवला होता. तर, दुसरीकडे डाव्या आघाडीच्या सरकारविरोधात आक्रमक भूमिका घेणारे व्ही. डी. सतीशन यांच्याही नावाला काहींनी पसंती दिली. मात्र, दिल्लीत झालेल्या बैठकी काँग्रेस हायकमांडने व्ही. डी. सतीशन यांच्या नावावर शिक्कामोर्तब केले.

युडीएफच्या विजयाचे शिल्पकार…

विधानसभेत केवळ आरोप न करता पुराव्यानिशी आणि आकडेवारीसह बोलणारे नेते म्हणून त्यांची ख्याती आहे. २०२६ च्या निवडणुकीत विखुरलेल्या विरोधकांना एकत्र आणून १०२ जागांपर्यंत नेण्याचे श्रेय त्यांच्या रणनीतीला दिले जाते. क्लिष्ट विषय सर्वसामान्यांना समजतील अशा भाषेत मांडण्यात त्यांचा हातखंडा आहे. मे २०२६ च्या विधानसभा निवडणुकीत त्यांच्या नेतृत्वाखाली युनायटेड डेमोक्रॅटिक फ्रंटने १०२ जागांसह मिळवलेला विजय हा त्यांच्या राजकीय कारकिर्दीतील सुवर्णक्षण मानला जात आहे.

कोण आहे व्ही. डी. सतीशन?

सतीशन यांनी आपला राजकीय प्रवास विद्यार्थी दशेत NSUI मधून सुरू केला. तळागाळातून काम करत त्यांनी आपली पकड मजबूत केली. सलग सहा वेळा आमदार राहिले आहेत. २००१ पासून आजवर (२००१, २००६, २०११, २०१६, २०२१ आणि २०२६) ते परवूर मतदारसंघातून सलग सहा वेळा निवडून आले. २०२१ ते २०२६ या पाच वर्षांच्या काळात त्यांनी विधानसभेत विरोधी पक्षनेते म्हणून सत्ताधाऱ्यांना अनेकदा अडचणीत आणले. विशेषतः आर्थिक मुद्द्यांवर त्यांनी केलेली मांडणी आजही चर्चेत असते.