महाराष्ट्र खाकी ( पिंपरी-चिंचवड / विवेक जगताप ) – पिंपरी-चिंचवडकरांची संवेदनशीलता ठरली आदर्श: मोशी कचरा डेपो दुर्घटनेतील ८ पीडित कुटुंबांना मिळाला हक्काचा निवारा , “गेलेला माणूस आपण परत आणू शकत नाही, पण त्यांच्या पश्चात कुटुंबाला हक्काचा आधार देणे ही आपली सामूहिक जबाबदारी आहे,” अशी भावना व्यक्त करत पिंपरी-चिंचवड शहराने एक अत्यंत संवेदनशील आणि कौतुकास्पद उदाहरण समोर ठेवले आहे. मोशी कचरा डेपो दुर्घटनेत दुर्दैवी मृत्यू झालेल्या ८ कर्मचाऱ्यांच्या वारसांना अखेर हक्काच्या घराची (सदनिका) सुरक्षितता मिळाली आहे.पिंपरी-चिंचवड महानगरपालिकेच्या माध्यमातून यशवंतनगर SRA प्रकल्पांतर्गत या ८ कुटुंबांना अधिकृतपणे सदनिका वाटप करण्यास मंजुरी मिळाली असून, या निर्णयामुळे पीडित कुटुंबांच्या आयुष्यात विश्वासाचा आणि नव्या आशेचा किरण निर्माण झाला आहे.
मोशी कचरा डेपो दुर्घटनेच्या त्या कटू आठवणी आजही मनाला वेदना देणाऱ्या आहेत. कुटुंबातील कर्ता माणूस गमावल्यानंतर निर्माण होणारी पोकळी कधीही भरून निघू शकत नाही. मात्र, या कठीण प्रसंगी त्या कुटुंबांच्या पाठीशी खंबीरपणे उभे राहणे, त्यांच्या हक्कासाठी पाठपुरावा करणे आणि त्यांना सन्मानाने जगण्याचे साधन मिळवून देणे हे समस्त पिंपरी-चिंचवडकरांचे नैतिक कर्तव्य होते. स्थानिक आमदार महेश लांडगे यांनी या संपूर्ण प्रक्रियेत महत्त्वाची भूमिका बजावत स्पष्ट केले की, “ही कोणतीही उपकाराची भावना नाही, तर आपल्या शहरासाठी कर्तव्य बजावताना जीव गमावलेल्या कर्मचाऱ्यांच्या कुटुंबांप्रती असलेली कृतज्ञता आणि माणुसकीची जाणीव आहे.” हा केवळ एक प्रशासकीय निर्णय नसून, संकटात सापडलेल्या आठ कुटुंबांच्या संघर्षाला मिळालेला खरा न्याय आहे. हा ऐतिहासिक क्षण प्रत्यक्षात आणण्यासाठी महापालिका प्रशासनातील अधिकारी, कर्मचारी आणि सर्व लोकप्रतिनिधींनी सकारात्मक भूमिका बजावली.
”लोकांचे दुःख आपण नाहीसे करू शकत नाही, पण संपूर्ण शहर त्यांच्या पाठीशी उभे आहे हा विश्वास त्यांना देणे हेच खरे उत्तरदायित्व आहे,” असे सांगत आमदार महेश लांडगे यांनी लोकप्रतिनिधी म्हणून केवळ पदावर राहणे नव्हे, तर नागरिकांच्या सुख-दुःखाशी नाते जोडणे महत्त्वाचे असते, हा संदेश दिला आहे. या सकारात्मक आणि दिलासादायक निर्णयामुळे पिंपरी-चिंचवड शहरात सर्वत्र समाधान व्यक्त केले जात असून, प्रशासनाच्या या संवेदनशील पावलाचे कौतुक होत आहे.
