महाराष्ट्र खाकी ( लातूर / विवेक जगताप ) – लातूर महानगरपालिकेत सत्ताधारी पक्षाच्या नगरसेवकांच्या मुजोरीमुळे प्रशासनाचे धाबे दणाणले आहेत. मनपाच्या अतिरिक्त आयुक्तांसोबत धक्काबुक्की आणि असभ्य वर्तणूक केल्याची अत्यंत संतापजनक घटना समोर आली आहे. या मनमानी कारभाराविरोधात आणि वाढत्या असुरक्षिततेमुळे संतापलेल्या मनपा अधिकारी व कर्मचाऱ्यांनी **कामबंद आंदोलन** पुकारले असून, लातूरच्या राजकीय आणि प्रशासकीय वर्तुळात मोठी खळबळ उडाली आहे.
माजी महापौर विक्रांत गोजमगुंडे यांचा संतप्त सवाल
या संपूर्ण प्रकारावर तीव्र संताप व्यक्त करत लातूरचे माजी महापौर विक्रांत गोजमगुंडे यांनी सोशल मीडियावर पोस्ट करत सत्ताधाऱ्यांचा खरपूस समाचार घेतला आहे.
“उच्चपदस्थ अधिकाऱ्यांसोबत सत्ताधारी पक्षाचे नगरसेवकच जर अशा प्रकारचे वर्तन करत असतील, तर प्रशासनाचे मनोबल कसे टिकणार?” असा थेट सवाल त्यांनी उपस्थित केला आहे.
प्रशासनावर वारंवार हल्ले; लातूरचा सुसंस्कृतपणा रसातळाला
माजी महापौर गोजमगुंडे यांनी आपल्या पोस्टमधून लातूर मनपातील काळ्या वास्तवावर प्रकाश टाकला आहे. त्यांनी म्हटले आहे की लातूरची संस्कृती धोक्यात जात आहे, यापूर्वीही उपायुक्त, विविध विभागप्रमुख तसेच महिला अधिकाऱ्यांसोबत गैरवर्तन करण्याचे प्रकार घडले आहेत.
काही घटनांमध्ये अधिकाऱ्यांच्या अंगावर धावून जाणे, त्यांना पादत्राणे दाखविण्यासारखे निंदनीय प्रकार घडले आहेत. लोकप्रतिनिधी आणि प्रशासन हे एका गाडीची दोन चाके आहेत, मात्र आज लातूर मनपात सुरू असलेल्या घडामोडींमुळे सुसंस्कृतपणाचा स्तर इतका खालावलेला लातूरकरांनी कधीही अनुभवलेला नाही.
अधिकारी-कर्मचारी आक्रमक; शिस्त आणि समन्वयाचा बोजवारा दोघांमध्ये समन्वय, सन्मान आणि शिस्त असणे आवश्यक असून प्रसंगी अंकुशही हवा, परंतु याचा अतिरेक कधीही खपवून घेतला जाणार नाही, अशी भूमिका घेत अधिकाऱ्यांनी एकजूट दाखवली आहे. अतिरिक्त आयुक्तांसारख्या वरिष्ठ अधिकाऱ्याला जर लातूरच्या भूमीत अशा अपमानास्पद वागणुकीला सामोरे जावे लागत असेल, तर सर्वसामान्य अधिकारी व कर्मचाऱ्यांच्या सुरक्षेचा प्रश्न ऐरणीवर आला आहे. या घटनेमुळे लातूर मनपातील सत्ताधाऱ्यांच्या अरेरावीविरोधात तीव्र संताप व्यक्त होत असून, दोषींवर कठोर कारवाईची मागणी जोर धरत आहे.
