महाराष्ट्र खाकी (नवी मुंबई / प्रतिनिधी) – सार्वजनिक आरोग्य व कुटुंब कल्याण मंत्री प्रकाश आबिटकर यांनी नवी मुंबईतील वाशी कामगार रुग्णालयाला अचानक भेट देऊन रुग्णकेंद्री प्रशासनाचे उत्कृष्ट उदाहरण घालून दिले. मंत्री महोदयांनी स्वतः विविध विभागांची सखोल पाहणी करून रुग्णांना मिळणाऱ्या सुविधा, स्वच्छता, औषध पुरवठा आणि एकूण व्यवस्थापनाचा आढावा घेतला.
पाहणीदरम्यान काही विभागांमध्ये सुधारणा आवश्यक असल्याचे लक्षात आल्यानंतर, मंत्री आबिटकर यांनी संबंधित अधिकारी आणि रुग्णालय प्रशासनाला तातडीने कार्यवाही करण्याचे स्पष्ट निर्देश दिले. स्वच्छता, मनुष्यबळ, वैद्यकीय उपकरणे, पायाभूत सुविधा आणि सेवा वितरण यात त्वरित सुधारणा करून रुग्णांना वेळेवर, सुरक्षित आणि गुणवत्तापूर्ण उपचार मिळावेत, यावर त्यांनी विशेष भर दिला.
मंत्री प्रकाश आबिटकर म्हणाले, “रुग्णालयात येणारा प्रत्येक नागरिक हा आपला कुटुंबीय आहे. त्याला सन्मानपूर्वक आणि दर्जेदार आरोग्य सेवा मिळणे ही शासनाची सर्वोच्च प्राथमिकता आहे.” रुग्णांच्या आरोग्य यंत्रणेवरील विश्वास अधिक दृढ व्हावा यासाठी सेवा अधिक परिणामकारक, पारदर्शक आणि रुग्णाभिमुख करण्याचे निर्देश त्यांनी दिले.
या भेटीमुळे रुग्णालय प्रशासनात नवी ऊर्जा निर्माण झाली असून, लवकरच सर्व त्रुटी दूर करून अत्याधुनिक आणि रुग्णस्नेही सुविधा उपलब्ध करून देण्यात येणार आहेत. मंत्री प्रकाश आबिटकर यांची ही कर्तव्यदक्षता आणि अचानक निरीक्षण ही आरोग्य विभागात सकारात्मक बदल घडवून आणणारी पावले आहेत. जनतेला दर्जेदार आरोग्य सेवा देण्याच्या दिशेने मंत्री महोदयांचा हा सक्रिय दृष्टिकोन कौतुकास्पद आहे.
