महाराष्ट्र खाकी ( लातूर / विवेक जगताप ) – शहरासह जिल्ह्यात मोटारसायकली चोरून त्यांची तोडफोड करत सुट्टे पार्ट करून भंगारात विकणाऱ्या एका सराईत चोराला लातूरच्या स्थानिक गुन्हे शाखेने (LCB) जेरबंद केले आहे. या धडक कारवाईमुळे लातूर जिल्ह्यातील तब्बल १२ गुन्हे उघडकीस आले असून पोलिसांनी आरोपीकडून २ लाख ९३ हजारांचा मुद्देमाल जप्त केला आहे.
कारवाईची ठळक वैशिष्ट्ये
तपास पथक – स्थानिक गुन्हे शाखा, लातूर.
आरोपीचे नाव – तौसिफ बादल शेख (वय २६ वर्षे, रा. हत्ते नगर, लातूर).
उघडकीस आलेले गुन्हे – एकूण १२ (गांधी चौक – ८, शिवाजीनगर – १, लातूर ग्रामीण – १, चाकूर – १ आणि कासारशिरसी – १).
जप्त मुद्देमाल – एकूण ₹२,९३,००० (चोरीच्या २ मोटारसायकली, सुट्टे पार्ट, नंबर प्लेट्स, विक्रीतून मिळालेली ₹२,५७,००० रोकड आणि तोडकामाचे साहित्य).
LCB पथकाने अशी केली कारवाई
पोलीस अधीक्षक अमोल तांबे आणि अपर पोलीस अधीक्षक मंगेश चव्हाण यांच्या मार्गदर्शनाखाली, स्थानिक गुन्हे शाखेचे पोलीस निरीक्षक सुधाकर बावकर यांच्या नेतृत्वातील पथक मोटारसायकल चोरीच्या गुन्ह्यांचा शोध घेत होते.
दिनांक २५ ऑगस्ट २०२६ रोजी मिळालेल्या गोपनीय माहितीनुसार, पथकाने हत्ते नगर परिसरातील एका घरावर छापा टाकला. तिथे आरोपी तौसिफ बादल शेख हा चोरीच्या गाड्यांचे पार्ट वेगळे करून ते फिरत्या भंगारवाल्यांना विकत असल्याचे उघडकीस आले. पोलिसांनी त्याच्या ताब्यातून इंजिनचे भाग, पेट्रोल टाक्या, सायलेन्सर, हँडल, चाके, चेसिस तसेच करवत, हातोडी, छत्री, पक्कड यांसारखे साहित्य जप्त केले.
आरोपी तौसिफ याला पुढील कायदेशीर कारवाईसाठी गांधी चौक पोलीस ठाण्याच्या ताब्यात देण्यात आले आहे. त्याच्याकडून आणखीही गुन्हे उघडकीस येण्याची दाट शक्यता असून पोलिसांकडून कसून चौकशी सुरू आहे. ही यशस्वी कारवाई सपोनि पांडुरंग माने, पोलीस अंमलदार नवनाथ हासबे, माधव बिलापट्टे, तुराबखान पठाण, मोहन सुरवसे, रियाज सौदागर, प्रदीप स्वामी, गणेश साठे, पाराजी पुट्टेवाड, प्रेम राठोड, शैलेष सुडे, श्रीनिवास जांभळे, हरी पतंगे, रामदास बाचीफळे यांनी पार पाडली.
