महाराष्ट्र खाकी ( छत्रपती संभाजीनगर / विवेक जगताप ) – छत्रपती संभाजीनगर शहराच्या स्वच्छता आणि घनकचरा व्यवस्थापनाला अधिक गतिमान आणि प्रभावी बनविण्यासाठी विभागीय आयुक्त जी. श्रीकांत (भा.प्र.से.) यांनी स्वतः पुढाकार घेतला. त्यांनी शहरातील विविध भागांमध्ये प्रत्यक्ष पाहणी करून स्वच्छता कर्मचाऱ्यांशी संवाद साधला आणि कामकाजाचा आढावा घेतला.
यावेळी आयुक्त जी श्रीकांत यांनी कचरा संकलन, वर्गीकरण आणि व्यवस्थापनाच्या कार्यक्षमतेची तपासणी केली. स्वच्छता उपक्रमांच्या अंमलबजावणीबाबत कर्मचाऱ्यांकडून माहिती घेऊन त्यांनी संबंधित अधिकाऱ्यांना आवश्यक सूचना व मार्गदर्शन दिले. शहरातील नागरी स्वच्छता अधिक शाश्वत, प्रभावी आणि आरोग्यदायी करण्याच्या दिशेने ते सक्रियपणे कार्यरत आहेत.
आयुक्त यांनी स्पष्ट केले की, स्वच्छ, सुंदर आणि आरोग्यदायी शहर निर्माण करण्यासाठी प्रशासनाच्या प्रयत्नांबरोबरच नागरिकांचा सक्रिय सहभागही तितकाच महत्त्वाचा आहे. त्यांच्या या कार्यतत्परतेमुळे शहरातील स्वच्छता अभियानाला नवीन ऊर्जा मिळाली असून, नागरिक आणि प्रशासन यांच्यातील सहकार्य अधिक दृढ होण्याची अपेक्षा निर्माण झाली आहे.
विभागीय आयुक्त जी. श्रीकांत यांच्या या प्रत्यक्ष हस्तक्षेपामुळे स्वच्छता कर्मचाऱ्यांमध्ये उत्साह वाढला आहे. त्यांच्या मार्गदर्शनाखाली शहर अधिक स्वच्छ आणि सुव्यवस्थित बनविण्याचे प्रयत्न जोमाने सुरू आहेत.
