महाराष्ट्र खाकी ( लातूर ) – लातूर महानगरपालिका महिलांसाठी मोफत बस सुविधा पुरविणारी देशातली पाहिली महानगरपालिका ठरली असून महिलांना अत्यंत सुरक्षित सेवा देणारी ही योजना अत्यंत यशस्वी होईल, असे प्रतिपादन राज्याचे वैद्यकीय शिक्षण मंत्री तथा जिल्ह्याचे पालकमंत्री अमित देशमुख यांनी केले. लातूर महानगरपालिका क्षेत्रात महानगरपालिकेच्यावतीने या सेवेचा शुभारंभ छत्रपती शिवाजी महाराज चौक, लातूर येथे त्यांच्या हस्ते झाला. त्यावेळी झालेल्या कार्यक्रमात ते बोलत होते.
यावेळी महापौर विक्रांत गोजमगुंडे, विरोधी पक्ष नेते दिपक सूळ, जिल्हा परिषदेचे मुख्य कार्यकारी अधिकारी अभिनव गोयल, महापालिका आयुक्त अमन मित्तल, माजी महापौर स्मिता खानापुरे, ज्येष्ठ नगर सेवक रविशंकर जाधव, महापालिका परिवहन समितीचे सदस्य, इतर नगरसेवक उपस्थित होते.
लातूर महानगरपालिकेच्यावतीने महिलांसाठी मोफत बस ही योजना अत्यंत योग्य काळात सुरु होत आहे. कोविडच्या एका पाठोपाठ एक अशा तीन लाटा आल्या. त्यामुळे पूर्ण क्षमतेनी कोणतीच गोष्ट करता आली नाही. आता मात्र, सर्व गोष्टी सुरळीत होत आहेत. त्यामुळे या बसचा महिलांना चांगला फायदा होईल. या बससाठी महिलांना स्मार्ट कार्ड देण्यात येईल, तसेच या बसमध्ये एक कर्मचारी महिला असेल.
तसेच या बससाठी काम करणाऱ्या कर्मचाऱ्यांचे पोलीस व्हेरीफिकेशन होईल. घरात आई आहे, वडील कामावर गेले, क्लास सोडायला कोणी नाही असे आता मुलीला वाटणार नाही. ती या बसमध्ये अत्यंत सुरक्षित प्रवास करेल, तिचे शैक्षणिक नुकसान होणार नाही. हे शैक्षणिक नगरी आहे, इथे सुरक्षितता आहे म्हणून हजारो विद्यार्थी इथे शिकायला येतात या नावलौकिकात या बसचा आता समावेश होईल असे प्रतिपादन पालकमंत्री अमित देशमुख यांनी केले.
या वेळी महापौर विक्रांत गोजमगुंडे यांनी लातूर शहरासाठीच्या योजनांचा आढावा घेतला. महिलांसाठी मोफत बस सेवेबाबत महापालिका आयुक्त अमन मितल यांनी माहिती दिली. माजी महापौर स्मिता खानापूरकर, नगर सेवक रवीशंकर जाधव यांनी आपले मनोगत व्यक्त केले
![Maharashtra Khaki](https://maharashtrakhaki.in/wp-content/uploads/2021/04/Photo_1617293848152-150x150.png)