महाराष्ट्र खाकी ( लातूर / विवेक जगताप ) – जिल्ह्यातील आयुष्मान भारत योजनेच्या अंतर्गत ‘आरोग्यवर्धिनी’ची अंमलबजावणीची तसेच आरोग्य क्षेत्रातील उपक्रमांची दखल घेवून प्रधानमंत्री नरेंद्र मोदी यांच्या हस्ते लातूर जिल्ह्याला राष्ट्रीय स्तरावर गौरविण्यात आले. राष्ट्रीय नागरी सेवा दिनानिमित्त आज नवी दिल्ली येथील विज्ञान भवनात
झालेल्या कार्यक्रमात प्रधानमंत्री नरेंद्र मोदी यांच्या हस्ते जिल्हाधिकारी पृथ्वीराज बी. पी. यांनी प्रधानमंत्री उत्कृष्ट नागरी प्रशासन पुरस्कार स्वीकारला. सन्मान चिन्ह, प्रमाणपत्र आणि 20 लाख रुपये असे या पुरस्काराचे स्वरूप आहे. कार्मिक, सार्वजनिक तक्रारी आणि निवृत्ती वेतन मंत्रालयांच्यावतीने आयोजित कार्यक्रमाला केंद्रीय
कार्मिक, सार्वजनिक तक्रारी आणि निवृत्ती वेतन विभागाचे मंत्री डॉ. जितेंद्र सिंग, प्रधानमंत्री सचिवालयाचे सचिव डॉ. पी. के. मिश्रा, कॅबिनेट सचिव राजीव गुबा आणि केंद्रीय कार्मिक, सार्वजनिक तक्रारी आणि निवृत्ती वेतन विभागाचे सचिव श्रीनिवास उपस्थित होते. यावेळी लातूरसह देशभरातील 15 प्रशासकीय अधिकाऱ्यांचा प्रधानमंत्री
पुरस्काराने गौरव करण्यात आला. दरवर्षी 21 एप्रिल हा दिवस ‘नागरी सेवा दिन’ म्हणून साजरा केला जातो. यंदाचे हे 16 वे वर्ष आहे. राष्ट्रीय नागरी सेवा दिनानिमित्त आयोजित या कार्यक्रमाला लातूरवरून गेलेले जिल्हा परिषदेचे मुख्य कार्यकारी अधिकारी अभिनव गोयल, जिल्हा आरोग्य अधिकारी डॉ. एच. व्ही. वडगावे,
अतिरिक्त जिल्हा आरोग्य अधिकारी डॉ. सतीश हरिदास, आरोग्यवर्धिनी सल्लागार सोनाली नागठाणे, तालुका आरोग्य अधिकारी प्रशांत कापसे उपस्थित होते. लातूर जिल्ह्यात आयुष्यमान भारत योजनेंतर्गत ‘आरोग्यवर्धिनी’ प्राथमिक आरोग्य केंद्र व प्राथमिक आरोग्य उपकेंद्रामार्फत विविध आरोग्य सेवा दिल्या जात आहेत. आरोग्यदायी
जीवनशैलीच्या मार्गदर्शनापासून ते विविध आजारांचे निदान, उपाचार संदर्भ सेवा इत्यादींचा यामध्ये समावेश आहे. या सर्व सेवांची व्याप्ती आणि गुणवत्तेच्या निकषावर लातूर जिल्ह्याला प्रधानमंत्री उत्कृष्ट सार्वजनिक प्रशासन पुरस्कार प्रदान करण्यात आला. जिल्ह्यात 233 आरोग्यवर्धिनी केंद्रामधून आरोग्य सेवा सातत्याने दिल्या
जात आहेत. यामध्ये गरोदर माता बालक, किशोरवयीन मुलींच्या आरोग्यविषयीच्या सेवा, संसर्गजन्य व रक्तदाब, मधुमेह, कर्करोग यासारख्या असंसर्गजन्य आजारांवरील उपचार, आपत्कालिनी आरोगय सेवा, कान नाक घसा विषयक, मानसिक आजारांवरील सेवा, तसेच आरोग्यदायी जीवनशैलीसाठी योगा, आहार, व्यायाम
यासारखे विविध उपक्रम यांचा समावेश आहे. लातूर जिल्ह्यात आरोग्यवर्धिनींच्या सेवा बळकट करण्यासाठी प्रशासनातर्फे निधीची उपलबधता करुन देणे, औषधांचा पुरवठा, अद्यावत रुग्णवाहिका यासारख्या उपाययोजना, तसेच कर्करोग निदानासाठीचे संजीवनी अभियान, मातामृत्यू रोखण्यासाठी सुरु करण्यात आलेला जीवनरेखा कक्ष, लोकांच्या सोयीसाठी गोवोगावी आरोग्य शिबिरे आदी नाविण्यपूर्ण उपक्रम राबविण्यात आले.
